A FAVEC APOIA A MANIFESTACIÓN DOS TRABALLADORES DA CRUZ VERMELLA

A FAVEC pide que non se perda unha infraestrutura sanitaria en Vigo tan importante e necesaria. Unha poboación tan grande que comprende a área de influencia de Vigo non pode verse privada dunha infraestrutura que presta atención a unhas persoas que tan especificamente a necesitan. Vigo non pode perder prestacións sanitarias, senón todo o contrario, debe loitar por mantelas, melloralas e aumentalas no posible.

Elena González Sánchez             Xosé Couñago Ribeira

Presidente FAVEC                          Secretario FAVEC

Abril 2010

ABUSO DAS CENTRAIS ELÉCTRICAS

Dende a Comisión de Traballo de Consumo da Federación de AA. VV. Limiar queremos denunciar o abuso manifesto das centrais eléctricas, pola súa prepotencia no paso do recibo mensual e en facelo en calidade de consumo estimado.

Deste xeito estanse a dar casos de recibos de cargo de cantidades desorbitadas o que ocasiona graves problemas a moitos aboados con baixos ingresos e en moitos casos no paro.Dende Limiar unímonos a todos eses aboados que presentaron reclamacións nas oficinas de Fenosa.

Esiximos que se volva o pago bimensual e o control do contador cada dous meses. En defensa de tódolos aboados, a nosa denuncia polo sistema actual.

Benita Conde Daaira. Marzo 2010

PRESIDENTA DA COMISIÓN DE TRABALLO DE CONSUMO

FEDERACIÓN DE AA.VV DE LIMIAR

TRANSPORTE METROPOLITANO : VOLVER A EMPEZAR

A nova periodística da enésima reunión sobre o “futuro transporte na futura area metropolitana” que se celebrou a pasada semana entre o Director Xeral de Mobilidade e os representantes dos concellos afectados, foia  ausencia dos alcaldes de Moaña e Cangas.

Que sexa esta a noticia é precisamente o que delata a inutilidade destas reunións: o morbo das presenzas e as ausencias. A habitual ausencia de Caballero xa non é noticia.

Para a Plataforma resulta patético que os que abortaron o plan piloto do transporte metropolitano de ría o ano pasado,  intenten xustificar agora o seu fracaso de xestión coa ausencia de dous alcaldes nunha nova reunión de presentación.

O duro traballo e a presión social fixo posible a sinatura dun protocolo en xaneiro do 2009 e a redacción dun convenio do transporte metropolitano de ría  para ser asinado en setembro do mesmo ano que os usuarios seguimos esperando. O presidente deste goberno que se gaba de cumprir súas promesas, dixo ben alto e claro en Moaña “no mes marzo do 2010 teremos transporte metropolitano de ría”, Vese que na Consellería entenderon ben a consigna política  “en marzo do 2010, volver a empezar”, como xa o fixeron antes, eles e outros, no 2003, no 2005 e no 2008...

A Plataforma,  que participa e apoia decididamente o traballo a prol do transporte metropolitano que veñen desenvolvendo as Federacións de AAVV de Vigo, Redondela e Val Miñor,  que concluíu o pasado mes coa presentación do Caderno Branco da Mobilidade e  cun ultimátum a Consellería, coñece perfectamente que esta foi unha reunión escaparate para responder a esta intensa campaña do movemento veciñal.

Pero nos parece un xesto ben inxenuo e de dubidosa utilidade para os usuarios que os concellos de Cangas e Moaña non estiveran representados nesta reunión. Non tiñan porque ir os alcaldes, existen concelleiros do ramo que ben puideron asistir para manifestar a posición  que logo os Alcaldes trasladaron os medios e cos que, lamentablemente, temos que estar de acordo: se non hai transporte metropolitano de ría é porque a Xunta non quere.

E xa non hai tempo que perder. Na Coruña, Ferrol e Santiago o sistema funciona dende hai 8 anos, sen que se formalizara a Area Metropolitana; Lugo, Ourense e Pontevedra vanse a incorporar nas mesmas condicións. Na comarca seguimos  a velas vir cun custo estimado para os cidadáns de 12 millóns de euros.

Paco Ferreira.

Voceiro 687 870 864

Marzo, 2010

Grupo de traballo da Plataforma: Federación AAVV A Chamusca (Moaña), Federación de AAVV Eduardo Chao (Vigo), Federación de AAVV de Cangas, Plataforma de Defensa da Ría de Vigo, CIG  e Usuario/as do transporte de ría.

REXEITAMENTO A INXERENCIAS POLÍTICAS

A Federación Limiar quere mostrar o seu máis enérxico rexeitamento a todo tipo de inxerencias políticas no movemento veciñal.

Nos últimos meses vimos detectando que persoas vinculadas a partidos políticos intentan desestabilizar o normal funcionamento de asociacións de veciños co fin de desestabilizalas e mesmo as dinamitar. Estas accións irían encamiñadas a facelas desaparecer ou a conseguir cambios nas directivas para conseguir colocar xente de confianza ou polo menos máis dócil co goberno municipal. Sabemos que entra dentro da estratexia dalgúns partidos de cara ás próximas eleccións municipais, xa que ademais esta presión esta aumentando de forma clara no último trimestre, con vistas a conseguir eses cambios con con tempo de abondo.

Polo tanto queremos recordar que o movemento veciñal non está disposto a consentir este tipo de actitudes tan pouco edificantes e que non axudan en nada a mellorar a cidade e os barrios de Ourense que é, ou debería ser, o obxectivo de todos.

Comisión Delegada da

"FEDERACIÓN DE AA.VV DE OURENSE LIMIAR"